Il-Kummissjoni Ewropea tiddefinixxi l-Akkwist Pubbliku Ekoloġiku bħala ‘proċess li bih l-awtoritajiet pubbliċi jfittxu li jakkwistaw, oġġetti, servizzi u xogħlijiet b’impatt ambjentali mnaqqas matul iċ-ċiklu tal-ħajja tagħhom meta mqabbla ma’ oġġetti, servizzi u xogħlijiet bl-istess funzjoni primarja. Ir-raġuni għal din l-inizjattiva ġejja mill-fatt li l-awtoritajiet pubbliċi fl-Ewropa huma konsumaturi ewlenin li jonfqu madwar ‘1.8 triljun ewro fis-sena li jirrappreżentaw 14% tal-prodott gross domestiku tal-UE’. Dan jippreżenta opportunità prezzjuża għal bidla trasformazzjonali permezz tal-ingranaġġ tas-setgħa tax-xiri tal-Awtoritajiet Pubbliċi biex iwasslu lill-ekonomiji lejn mudell ekonomiku aktar ċirkolari u ekoloġiku.

Fl-2021, il-Ministeru għall-Ambjent, l-Enerġija u l-Intrapriża ippubblika t-tieni Pjan Nazzjonali (2nd NAP) dwar l-Akkwist Pubbliku Ekoloġiku. Il-kriterji l-ġodda stabbiliti f’dan id-dokument u d-dispożizzjonijiet il-ġodda inklużi fih immirati biex iżidu l-użu tal-GPP, daħlu fis-seħħ mill-1 ta’ Jannar 2022. Filwaqt li jibni fuq is-suċċess miksub fl-ewwel Pjan Nazzjonali, it-tieni Pjan tal-GPP għandu l-għan li jżied b’mod progressiv is-sehem tal-akkwist tal-gvern fi prodotti u servizzi aktar ekoloġiċi għal 90 % sal-2025, li għalkemm mhix stabbilita mill-Kummissjoni Ewropea, se tmexxi azzjoni fuq il-post, li tippromwovi konsum u produzzjoni sostenibbli.

Il-Pjan jistabbilixxi miri għal sbatax-il grupp ta’ prodotti u servizzi, li erbatax minnhom huma ta’ status obbligatorju. It-Tieni Pjan Nazzjonali introduċa wkoll disa’ inizjattivi ġodda b’rabta mal-proċeduri tal-akkwist pubbliku sabiex jiġu indirizzati b’mod aktar effettiv il-miri ambizzjużi maħsuba għall-GPP f’Malta. B’kuntrast mal – ewwel Pjan Nazzjonali, it-tieni Pjan Nazzjonali qed jinforza li il-kwotazzjonijiet (b’valur ta’ ħamest elef ewro u aktar) jinkorporaw kriterju tal-GPP, filwaqt li jitlob ukoll aktar informazzjoni relatata mal-ispiża stmata eżatta tas-servizz/xogħol/prodott matul il-pubblikazzjoni tas-sejħa għall-akkwist.

It-tieni Pjan Nazzjonali introduċa diversi kriterji ġodda fis-suq filwaqt li aġġorna wkoll kriterji qodma b’rekwiżiti ambjentali aktar ambizzjużi li jridu jiġu implimentati. Hemm total ta’ erbatax-il grupp ta’ prodotti bi kriterji obbligatorji u tlieta oħra mhux obbligatorji. Dawn jikkonsistu minn: